Iloilo – Nagpangayo sang pasaylo si Iloilo Governor Arthur Defensor Jr. kay Iloilo City Mayor Jerry Treñas matapos ginpahayag ginpakamalaot ini sang isa ka Department Head sang Iloilo Provincial Government kag ginbasol ang mga tinawo sang Public Safety and Transportation Management Office bangud sa pagpugok sang trapiko sa Ungka Flyover.
Sa interview sang Bombo Radyo kay Trenas, iya ginpahayag nga i-review pa sang gobernador ang iya maobra sa nangin pagtratar sang iya tinawo sa alkalde kag sa City Government.
Suno kay Trenas, kilala sini ang nasambit nga department head apang mas ginpili nalang sini nga indi pagpangalanan sa kahanginan.
Gin-athag man sang alkalde nga indi na obligasyon sang traffic aides ang pag-manihar sang trapiko sa amo nga lugar bangud indi na ini ila hurisdiksyon.
Talalupangdon man nga makapila ka beses na nga ginatawag sang alkalde nga Pavia flyover ang amo nga kontrobersyal nga proyekto sa baylo nga Ungka Flyover.
Ginkumpirma man sang alkalde nga papadayunon na lang anay sang Iloilo City traffic aides ang pagbulig sa pag-manage sang traffic sa amo nga lugar.
Kahapon, matandaan nga nag-anunsyo si Trenas nga i-pull out niya ang mga traffic aides sang syudad nga nagabulig sa traffic congestion sa Ungka Flyover bangud ang Public Safety and Transportation Management Office na ang ginabasol sang iban nga mga tawo.
Magluwas diri, ginpahayag man sang alkalde nga madamo nga mga negosyante ang nagreklamo nga naapektuhan ang ila negosyo tungod sa traffic sa area.
Bilang chairman sang Infrastructure Committee sang Regional Development Council, nagpatawag man siya sang pagsinapol kaupod sa Department of Public Works and Highways Region 6 agud nga maka-update ang ahensya sa status kag sa plano sa kontrobersyal nga P680 million nga Ungka Flyover.
Naka-schedule ang meeting sa Huwebes, Pebrero 9.
