Nagdangat na sa P12.59-million ang napanagtag sang Iloilo provincial government sa masobra 2,000 ka kuwalipikado nga senior citizens halin sang nagsugod ang distribusyon sang kuwarta sang Disyembre 2023 sa idalom sang Provincial Ordinance No. 2020-216.
Ini nga ordinansa nga naaprubahan sang 2022 ang nagasaad nga may ihatag nga monetary rewards kag recognition sa senior citizens nga naga-edad 85-pasaka.
Sa interview sang Bombo Radyo kay Anna Rapunzel Ganzon, focal person sang Provincial Social Welfare and Development Office (PSWDO), iya ginpahayag nga base sa lista sang talatapan, halin sang 2023, masobra sa P9.23 million ang napanagtag sa 1,847 ka octogenarians, masobra P1.11 million sa 223 ka nonagenarians, kag masobra P2.24 million para naman sa 112 ka centenarians.
Gin-athag sini nga augmentation lamang ang ginahatag sang provincial government bangud dapat nga may yara man sang direkta nga ginhatag ang local government units para sa mga tigulang sa ila hurisdiksyon.
Sa palaabuton nga Oktubre, may igahatag man nga awards sa senior citizen-friendly municipalities/cities kaangot sa selebrasyon sang Elderly Week kun sa diin may P50,000 sa first place; P30,000 sa second place; kag P20,000 sa third place.
Matandaan nga sang Agusto lamang, ginkumpirma sang Department of Social Welfare and Development (DSWD) nga nangkakas ini sang 13,468 senior citizens sa Western Visayas halin sa social pension program.
Sa ginpangkakas sa listahan, nagapanguna ang Iloilo sa Rehiyon VI nga may 5,324.
Ginpahayag sang talatapan nga ang lihok nila ang kasunod sang kumprehensibo nga revalidation process agud masiguro nga ang eligible senior citizens lamang ang makabaton sang ginatanyag nga cash halin sa social pension program.
