ILOILO – Wala sang mangin dako nga pagbag-o sa tion nga kilalahon bilang “low risk area” ang probinsya sang Iloilo.
Ini ang may kaangtanan sa ginahulat nga desisyon ni Presidente Rodrigo Duterte may kaangtanan sa quarantine classifications sa mga lugar sa Pilipinas.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga kun pananglitan nga mag bag-o ang klasipikasyon sa probinsya, kinahanglan nga ma-adjust ang Executive Order.
Apang suno kay Gov. Defensor, indi tuman ka dako ang pagbag-o sa executive order sa diin lima tubtob anom lang ka mga provisions ang mahimo nga i-adjust.
Sa bahin naman sa pagbalik sang flights, pahayag sang gobernador, lunsay mga locally stranded individuals (LSIs)kag Overseas Filipino Workers (OFW) lang anay ang mangin pasahero sang mga eroplano bangud yara pa sa “high risk areas” ang Metro Manila amo man ang Cebu.
Mas maayo suno kay Defensor nga regulated kag organisado ang pagpauli sang mga LSIs kag OFWs.
Dugang pa sang natungdan, sa tion nga magpauli sa Iloilo ang mga Locally Stranded Individuals kag Overseas Filipino Workers, gilayon ini dal-on sa quarantine facility.
Sa subong pahayag niya, wala na sang local transmission ang probinsya kag lunsay mga LSIs kag OFWs ang na rekord sang Department of Health Region 6 nga nagpositibo sa Coronavirus Disease 2019 (COVID-19).
