Ginapreparar na sang Iloilo Provincial Agriculture Office ang mga tikang agud mabuligan ang mga mangunguma nga naapektohan sang lapnagon nga infestation sang red-striped soft scale insect (RSSI).
Ang nasambit nga mga inisyatibo kasunod sang rekomendasyon sang Iloilo Provincial Disaster Risk Reduction and Management Council (PDRRMC) sa pagdeklara sang state of calamity sa probinsya bangud sa RSSI infestation.
Sa interview sang Bombo Radyo kay Acting Iloilo Provincial Agriculturist Geron Magbanua, iya ginpahayag nga nagahanda na ang provincial government sa pag-establisar sang duha tubtob tatlo ka mga temporaryo nga extension laboratories agud mapataas ang produksyon sang biological control agents nga makabulig sa pagpahagan-hagan sang infestation.
Suno kay Magbanua, gina-identify na sang opisina ang available nga mga buildings nga mahimo magserbe bilang temporary laboratories kag kinahanglan man sang provincial government ang pagbakal sang equipment agud maka-reproduce sang biological control agents.
Gin-athag sang natungdan nga samtang mandato sang Department of Agriculture (DA) ang pag-produce sang pure strains sang biological control agents, maga-focus naman ang provincial kag municipal agriculture offices sa pag-multiply sang sini nga mga agents kag sa paghatag sini sa mga apektado nga mangunguma bilang kabahin sang rehabilitation kag adaptation efforts sang probinsya.
Pahayag niya, 27 ka mga banwa ang nag-report nga may mga damage tuga sang RSSI, kag ini nga mga lugar ang i-prioritize para sa assistance sandig sa reports nga ginpasa.
Nahibaluan man nga ang Passi City, San Enrique kag Duenas ang nakadeklara na sang state of calamity bangud sa infestation.
Dugang pa nga gamiton anay sang probinsya ang regular funds para sa RSSI response nga P15 million kag kun kulang, amo na ang paggamit sang Quick Response Fund (QRF) nga nagabalor sang P180 million.
