ILOILO CITY – Nagpanugyan ang Iloilo Provincial Agriculture Office sa mga mangunguma nga magtanum sang utan ukon high-value crops subong nga tag-ilinit.
Sang nagligad nga bulan, gin-upgrade sang Philippine Atmospheric, Geophysical and Astronomical Services Administration ang monitoring sang oceanic temperatures sa El Niño Watch, buot silingon, dako ang posibilidad nga ang El Niño phenomenon ang maga-develop sa masunod nga anum ka bulan.
Sa interview sang Bombo Radyo kay Dr. Ildefonso Toledo, pinuno sang Iloilo Provincial Agriculture Office, iya ginpahayag nga nagahulat pa sila subong sang advisory nagikan sa weather state bureau kun may yara gid man sang El Niño sa subong.
Suno kay Toledo, indi advisable ang pagtanum sang humay bangud nga dako lang ang mapyerde sang mga mangunguma.
Sa baylo, gina-enganyo ang mga mangunguma nga magtanum sang utan kag high-value crops.
Ginpahayag ni Toledo nga maayo nga itanum ang bombay kag sandiya.
