ILOILO CITY – Mahimo nga magpangatubang sang penalidad ang mga nagalapas sa odinansa sang probinsya sang Iloilo nga nagahatag sang proteksyon kag prebilihiyo sa mga solo parent.
Sa interview sang Bombo Radyo kay Christine Roa, Social Welfare Assistant sa Provincial Social Welfare and Development Office, iya ginpahayag nga may yara sang Provincial Resolution number 2018-283 nga nagahatag sang benepisyo sa mga solo parent.
Sa nasambit nga resolution, mahimo nga maka-avail sang parental leave nga pito ka adlaw ang isa ka solo parent, may medical assistance pinaagi sa discount sa mga government-owned hospitals, may benepisyo sa PhilHealth kag mahimo man nga maka-avail sang mga mga livelihood trainings kag may express lanes ilabi na sa mga terminals.
Ang mahibaluan nga naga-bayolar sang amo nga resolution ang mahimo nga magmulta sang P1, 000 kag isa ka bulan nga pagkabilanggo sa una nga offense; P2, 000 kag duha ka bulan nga pagkabilanggo sa 2nd offense kag P5, 000 nga multa kag isa ka tuig nga pagkabilanggo sa 3rd offense.
Dugang pa ni Roa, obligado ang tagsa ka mga kabanwahanan nga mag-organisa sang grupo nga ginabug-usan sang mga solo parents.
Ginklaro ni Roa nga ang mga kwalipikado gid lamang nga mga solo parent ang mahimo nga mangin myembro sang grupo nga nagabase sa Republic Act 8972 ukon ang Solo Parents’ Welfare Act of 2000.
