ILOILO – Naghatag sang panugyan ang Iloilo Provincial Disaster Risk Reduction and Management Office (PDRRMO) may kaangtanan sa pagsulod sang tig-ululan sa bulan sang Hunyo.
Sa interview sang Bombo Radyo kay Dr. Jerry Bionat, iya ginpahayag nga naga umpisa na ang ila mga opisyales sa paglibot sa probinsya sang Iloilo agud malab-ot ang mga pumuluyo, opisyales sang barangay kag estudyante pinaagi sa pagpatigayon sang seminar.
Ini ang pamaagi suno kay Bionat nga masanagan kag madugangan ang kaalam sang mga tawo tuhoy sa pagpanghanda sa tion nga mag-abot ang ulan sa probinsya.
Prayoridad sang PDRRMO nga makadtuan ang mga lugar nga yara sa Norte nga bahin sang probinsya.
Ang programa nga ginapatigayon sang opisina amo ang Project-ART ukon Automatic Readiness and Tactical Program nga nagahatag sang impormasyon sa pagpanghanda nga kinahanglanon sa tion sang bagyo sa diin ini ang ginhimoan sang poster kag nakasulat sa hiligaynon.
Paathag ni Bionat, ang signal number 1 ang nagahatag sang paandam sa mga tawo nga ang bagyo ang mahimo nga maglaslas sa isa ka lugar sa sulod sang 36 ka oras; 24 ka oras kun signal number 2; 18 ka oras kun signal number 3; kag 12 ka oras naman kun signal number 4.
Panugyan sang PDRRMO, nagakadapat nga luyag makatuon ukon makahibalo ang isa ka tawo sa pagpanghanda sa tion sang kalamidad bangud kun may yara sang ihibalo ang tawo, mahimo na ini nga makaatubang sa mga problema kag kalamidad nga wala sang pagbatyag sang kakulba ukon pagsalangisag.
