ILOILO – Nagakadapat nga tun-an kag diskusyonan sang maayo base sa datos ang mangin desisyon sang Iloilo Provincial Government sa pagtapos sang ECQ sa Abril 30.

Sa interview sang Bombo Radyo kay Iloilo 3rd District Rep. Lorenz Defensor Jr., iya ginpahayag nga kun balik-balikan, ginpatuman ang enhanced community quarantine agud nga matapna ang paglapta sang Coronavirus Disease 2019.

Katuyuan man sang enhanced community quarantine amo nga matumod sang Local Government Unit kag Department oF Health ang mga Persons Under Monitoring kag Persons Under Investigation agud matigayon ang pag test sa ila.

Kun buksan gilayon ang bug-os nga probinsya pagkatapos sang Abril 30 kag wala pa napaidalom sa testing ang tanan kag maglagaw na ang mga tawo, mahimo nga maglapta ang virus.

Pabor si Defensor kun modified community quarantine ang ipatuman agud nga mapasangkad pa ang mga tikang nga ginahimo sa mga banwa nga may yara sang mga positibo nga kaso sang COVID-19.

**************************************

Gindayaw man ni Cong. Defensor ang pagdumala sang Local Government Unit sang Lambunao sa paghatag sang suporta sa mga pumuluyo subong nga yara sa enhanced community quarantine kag ilabi na nga may kaso sang COVID-19 sa nasambit nga banwa.

May yara na sang ginpa download si Cong. Defensor sa alkalde sang banwa para sa cash assistance halin sa Department of Social Welfare and Development kag Department of Labor and Employment.

Sa subong, ginatinguhaan man niya sa Kongreso nga iduso nga ilakip ang mga Barangay Officials nga mahatagan sang Social Amelioration Fund bangud sila ang makabig man nga frontliner kag gamay man langa ng honorarium nga ila ginabaton.

**************************************

Sa bahin naman sang mga na stranded nga mga Ilonggo sa Manila, pahayag ni Defensor, subong nga yara sa enhanced community quarantine, luyag sang tanan nga maka upod ang ila tagsa ka mga pamilya.

Apang antes kun tani nga papulion ang mga Ilonggo ukon mga Overseas Filipino Workers, siguraduhon nga nakapaidalom ang mga ini sa testing kag quarantine.

Suno kay Defensor, indi lang ang proteksyon sang Overseas Filipino Workers ang ginalantaw kundi ang mga tawo man sa komunidad kag mismo ang ila pamilya nga puli-an.

Kun pabay-an lang ang pagguwa sulod sang mga Overseas Filipino Workers, posible nga mangin delikado ini para sa ila nga pamilya.