ILOILO – Hugot nga dumilian sang Iloilo Provincial Government ang paghiwat sang mga videoke, karaoke kag makahulubog nga ilimnon sa pampubliko nga lugar tubtob sa Disyembre 31, 2020.
Sa interview sang Bombo Radyo kay Governor Arthur Defensor Jr., iya ginpahayag nga sa idalum sang executive order 183, yara pa sa idalum sang Modified General Community Quarantine (MGCQ) classification ang probinsya sang Iloilo.
Bangud diri, ginadumilian ang pagbukas sang mga bars, clubs, restaurants kag iban pa nga balay ilimnan nga nagaserbe sang makahulubog nga ilimnon bangud ini ang ginatunaa sang paglapas sang physical distancing sang mga pumuluyo.
Suno kay Defensor, subong nga bulan sang Disyembre ang may pinakadako nga posiblidad sang pagsaka sang COVID-19 cases bangud sa holiday season.
Pahayag sang gobernador, mahimo maka-videoke ukon magselebrar ang pamilya apang sa sulod lamang sang balay, lakip na ang consumption sang makahulubog nga ilimnon para sa seguridad sang tanan batok sa paglapta sang COVID-19 virus.
