ILOILO — Ginalantaw sang Iloilo Provincial Government ang long term solution sa mga naapektohan nga mga mangunguma sa probinsya kasunod sang pagpaidalum sa Iloilo sa state of calamity bangud sa El Niño Phenomenon.
Sa ginpatigayon nga session subong nga adlaw, may yara na sang 852 ka mga mangunguma sa Iloilo Province ang naapektohan sang nasambit nga kalamidad.
Tuyo naman nga hatagan sang mga baboy nga idik ang rice farmers agud manguin alternative livelihood samtang yara pa ang probinsya sa state of calamity.
Kun ma-apobahan ang suhestyon, masobra 1,700 ka mga baboy ang posible nga ipanghatag sa mga mangunguma sa probinsya.
Naghatag man sang suhestyon si Iloilo Vice Governor Christine Garin nga hatagan sang pinansyal nga bulig agud direkta nga magamit sang mga naapektohan nga farmers.
Ginalantaw naman sang provincial government nga ilakip ang mga suhestyon sang mga board members sa pagdihon sang pondo agud masolusyonan ang epekto sang El Niño sa probinsya.
