𝗜𝗟𝗢𝗜𝗟𝗢 𝗖𝗜𝗧𝗬 — Hulaton anay sang Iloilo Provincial Government ang mangin rekomendasyon sang Civil Service Commission may kaangtanan sa reklamo ni Iloilo City Mayor Jerry Treñas kay Iloilo Provincial Information and Community Affairs Office Head Mr. Nereo Lujan.
Una nga nagpaguwa sang Executive Order No. 151 si Iloilo Governor Arthur Defensor Jr. nga nagatukod sang fact-finding committee agud imbestigaran ang mga facebook posts ni Mr. Lujan batuk kay Mayor Trenas.
Sa interview sang Bombo Radyo kay Atty. Dennis Ventilacion, Provincial Legal Officer, iya ginpahayag nga gindagdagan sang show cause order si Lujan sang Mayo 23 kag nakapasa man ini sang iya eksplinasyon sang Mayo 28 sa nasambit nga komitiba.
Suno kay Atty. Ventilacion, mahimo nga ang Civil Service Commission ang mag-assume sang hurisdiksyon kag indi na magpatigayon pa sang imbestigasyon ang Provincial Government bangud ini ang ma-duplicate.
Apang pahayag sang Legal Officer, mahimo man nga ipasa sang Civil Service Commission sa Iloilo Provincial Government ang pag-imbestigar bangud ang disciplining authority ni Lujan amo si Governor Defensor.
Dugang pa sang natungdan, mahulat na lang ang Provincial Government sa mangin desisyon sang Civil Service Commission bangud indi ini mapangunahan sang fact-finding committee.
