Ginlakip ni Iloilo Governor Arthur Defensor Jr. sa Executive order number 40 series of 2025 ang Sipag at Tiyaga for MoRProGres sa Bagong Pilipinas ukon ang P20 per kilo nga bugas nga tuyo ibaligya sa target population sa Iloilo.
Subong nga adlaw, nagpatawag ang gobernador sang coordination meeting sa mga natungdan nga talatapan agud matapos ang preparasyon sa paglunsar sang amo nga inisyatibo.
Ini kasunod man sang ginmanduan ni Agriculture Secretary Francisco P. Tiu Laurel Jr. ang National Food Authority (NFA) nga sugdan na ang pag-reposition sang rice stocks sa Visayas bilang preparasyon sa paglunsar sang P20-per-kilo rice program.
Sa interview sang Bombo Radyo kay Governor Defensor, iya ginpahayag nga ang makabakal sang tag-P20 kada kilo nga bugas amo ang mga pamilya nga undernourished.
Suno kay Defensor, may yara subong sang 11,000 ka kabataan sa Iloilo ang undernourished.
Gin-athag man sini nga ang pagbaligya sang well milled rice sang Provincial Government ang wala nasakop sang programa sang National Government sa hunger mitigation.
Dugang niya nga ang tikang ang isa ka suporta sa panawagan ni President Ferdinand Maros, Jr., nga makabaligya sang P20 nga kilo sang bugas.
Sa diin ang probinsya ang magahatag sang subsidy para sa galastuhon.
Nahibaluan nga ang probinsya mismo ang mahimo sang produksyon sang palay kag i-proseso sa ART Center sa Pototan.
