Magahimo sang legal nga tikang ang Iloilo Provincial Government may kaangtanan sa insidente sa Zarraga, Iloilo nga ginakaulamiran sang truck nga ginaalegar nagtinguha nga bunggoan ang mga myembro sang task force kadungan sang inspeksyon.
Sa interview sang Bombo Radyo kay Atty. Cesar Emmanuele Buyco, head sang Iloilo Provincial Environment and Natural Resources Office (PGENRO), iya ginpahayag nga ang tikang ang sandig sa mandu sang Iloilo Provincial Administrator’s Office bangud sa idalom sang nasambit nga opisina ang task force.
Suno kay Buyco, halin ang task force sa Barangay Dawis sang nakit-an sang task force ang nagasunod-sunod nga mga truck rason nga gin-flag down nila ini para sa inspeksyon.
Gin-athag niya nga ang trucks nga may karga nga sand and gravel ang dapat may dala nga mga dokumento kaangay sang delivery receipt ukon transfer permit, nga nagapakita nga dokumentado ang ila mga ginadala.
Apang, ginaalegar nga ang isa ka truck wala nagpondo kag nag-attempt pa nga bunggoan ang mga myembro sang task force.
Bangud sini, ginlagas sang team ang truck kag gintinguhaan nga balabagan kag punggan samtang nagapangayo sang bulig ang task force sa kapulisan.
Pahayag ni Atty. Buyco, makapila ka beses nga ginbalabagan sang salakyan sang task force ang truck apang liwat-liwat man ini nga naga-maneuver agud nga makapalagyo.
Nag-untat ang truck apang madasig nga naglumpat ang driver kag nagdalagan palagyo.
Sa subong, ang truck yara na sa kustodiya sang Zarraga Municipal Police Station.
Ginpahayag ni Buyco nga gina-imbestigaran naman sang legal office sang provincial government ang insidente kag ginadetermina ang mga legal action nga himuon.
Gina-verify naman sang Iloilo PGENRO ang tag-iya sang truck kag nagapakig-angot na sa Land Transportation Office gamit ang plate number sini.
Sa tion nga makilala ang tag-iya, i-identify man ang driver.
Gin-athag ni Buyco nga regular nga nagapatigayon sang inspeksyon ang task force sa mga haulers agud ma-check kun may dala ang mga ini sang valid documents sa pag-transport sang sand and gravel.
Text by: Bombo Lyndc Bade
