Iloilo – Magatukod sang disaster resilience operations hubs ang Iloilo Provincial Government subong nga tuig 2023.
Natigayon na nga ma-release ni Iloilo Governor Arthur Defensor, Jr. ang tseke nga nagabalor sang P5 million kada isa sa apat ka mga banwa sa probinsya nga ginalakipan sang Banate, Carles, Estancia kag Miagao kun sa diin ipahamtang ang operations hub.
Sa interview sang Bombo Radyo kay Dr. Jerry Bionat, Provincial Disaster Risk Reduction and Management Office, iya ginpahayag nga ang hubs ang magaserbe nga opisina sang Municipal Disaster Risk Reduction and Management Office, Philippine Coast Guard, Maritime Police kag Philippine National Police agud nga mangin smooth ang communication sa Provincial Civil Defense Operations Center sa provincial Capitol.
Suno kay Bionat, pinaagi sa hubs nga pagatukuron, ang transmission sang impormasyon ang mangin madasig, gilayon nga mapatuman ang emergency responses kag mangin timely ang arrival sang assistance.
Ang provincial government ang magatanyag man sang dugang nga bulig kaangay sang paghatag sang computer sets, telephones kag iban pa nga equipment nga kinahanglanon agud nga mangin functional ang hubs.
Pahayag sang natungdan, ang apat ka mga banwa amo ang una nga recipients bangud may yara na ang mga ini sang duta sa diin itukod ang operations hub.
Ang two-storey building ang may yara sang office, shelter, comfort room kag warehouse para sa equipment.
Yara sa strategic areas ang apat ka mga banwa bangud flood-prone ang mga ini ukon located sa coastal areas.
Ginasiguro man ni Dr. Bionat nga madamo nga mga operations hubs ang ibutang sa tagsa ka mga banwa sa probinsya.
Dugang sang natungdan, sa mga natabo nga kalamidad, trahedya kag emerhensya, may yara sang delayed reporting nga nagakatabo bangud sa kakulang sang personnel kag equipment sa municipal level.
