ILOILO– Nakahanda na ang first, second, kag third defense sang Iloilo Provincial Government sa padayun nga pagsaka sang kaso sang dengue hemorrhagic fever sa probinsya sang Iloilo.
Sa interview sang Bombo Radyo kay Iloilo Governor Arthur ‘Toto’ Defensor Jr, iya ginpahayag nga padayun ang pagsaka sang kaso sang dengue kag naga- alalawas ang pasyente sa tagsa ka district hospitals.
Suno kay Defensor, may yara na sang kakulang sa mga doctors, medical technologists, nurses kag utility workers.
Sa iya paglibot sa tagsa ka mga hospitals suno kay Defensor, iya ginasekyar kun may yara pa sang mga available pa nga mga bulong, testing kits kag mga dextrose.
Ginalauman man sang gobernador nga maistoryahan sang Sangguniang Panlalawigan ang pagdeklarar sang state of calamity agud magamit ang calamity fund sang probinsya.
Nakapatigayun naman suno sa iya sang emergency purchases agud indi mawad-an sang kinahanglanon nga bulong ang tagsa ka hospitals.
Timpramo pa suno kay Defensor umpisahan ang pagtrabaho subong nga semana bangud may tyansa pa nga magtaas ang kaso sang dengue sa probinsya.
Nagpagwa naman sang moratorium ang gobernador sang kanselasyon sang pagsinapol sang mga departamento nga pagahiwatun sa gwa sang probinsya agud matutukan kag preparahan ang nagataas nga kaso sang dengue.
