ILOILO CITY – Mas ginapabaskog pa sang Iloilo provincial government ang pagpanghanda sa posible pagtimbu-ok sang kaso sang COVID-19 sa bulan sang Hunyo.
Sa interview sang Bombo Radyo kay Iloilo governor Arthur Defensor Jr., iya ginpahayag nga padayon ang pagdihon sang executive order nga nagaplastar sang mga pagsulundan sa probinsya agud nga malikawan ang pagtimbu-ok sang kaso sang COVID-19.
Dugang pa niya, tinutuyo sang probinsya nga mas pasangkaron pa ang vaccination program kag indi lamang ang booster shots.
Sa subong nga panahon, mahimo na nga makabaton sang bakuna ang halos tanan nga age group.
Lakip sa ginadihon sa executive order amo ang posible pagdugang sang incentives sa mga mapabakuna.
Kabahin man sini ang pagsugod na sang ikaduha nga COVID-19 booster shots.
