ILOILO CITY- Nagpaathag ang Iloilo Provincial Government may kaangtanan sa reklamo sa delayed nga sweldo sang 52 nga mga health workers nga ginhire sang probinsya kag gin-deploy sa Western Visayas Medical Center (WVMC).
Sa interview sang Bombo Radyo kay Provincial Administrator Atty. Suzette Mamon, iya ginpahayag nga may yara sang requirements sa nasambit nga mga health workers apang ang iban sa ila ang wala pa naka-comply.
Suno kay Atty. Mamon, nalakip sa mga requirements amo ang affidavit halin sa Bureau of Internal Revenue kag amo man ang Tax Identification Number (TIN).
Pahayag sang provincial administrator, importante ang TIN agud nga maka-open sang account sa bangko samtang ang BIR affidavit naman ang magapasiguro nga ma-exempt sila sa tax kag indi mabuhinan sang 13% ang ila mabaton nga sweldo.
Suno pa sa natungdan, nakabaton na ang nasambit nga mga health workers sang ila sweldo para sa Hunyo kon san-o nag-umpisa ang ila kontrata apang ang ila sweldo sa bulan sang Hulyo amo pa ang natalana nga i-release.
Dugang niya, plano naman sang probinsya kaupod ang Hospital Management Office (HMO) nga i-prioritize na lang ang health workers nga mas nauna nga naka-proseso sang ila requirements kag ipalagas nalang ang iban agud indi makompromiso ang ila mga sweldo.
Gin-athag naman niya nga indi intensyon sang provincial government nga i-delay ang sweldo sang natungdan nga mga health workers, sa baylo, ginaplastar lang ini sang maayo.
