ILOILO CITY – Nagpanawagan ang Iloilo Provincial Government sa wala pa nabakunahan nga magpatublok na kadungan sa pag-detect sang bag-o nga variant sang Coronavirus Disease 2019 (COVID-19).
Ang bag-o nga variant ang ginalakipan sang XBB variant kag XBC variant.
Sa interview sang Bombo Radyo kay Dr. Ma. Socorro Quiñon, head sang Iloilo Provincial Health Office, iya ginpahayag nga base sa pagtuon, dako ang bulig sang bakuna agud nga malikawan ang pag-angkon sang severe disease apisar nga madasig ini nga manglaton.
Sa probinsya sang Iloilo, may na-record nga apat ka kaso sang XBC Variant nga nagikan sa banwa sang Pavia.
Samtang, may yara naman sang 14 ka mga kaso sang XBB Variant nga ginalakipan sang mga masunod.
Tag-tatlo sa banwa sang Oton kag Pavia kag may tag-isa naman ka kaso sa Passi City, Alimodian, Cabatuan, Lambunao, Leganes, Miagao, San Miguel, Santa Barbara.
Suno kay Quiñon, posible nga ini ang rason sang hinali nga pagtaas sang kaso sang Coronavirus Disease 2019.
Nagpanugyan naman ang natungdan nga bakuna gid lamang ang makahatag sang proteksyon kadungan sang pagtuman sang minimum health protocols.
