ILOILO CITY- Padayon ang pagdul-ong sang Iloilo Provincial Government sang mga relief packs para sa mga apektado nga pumuluyo sa mga kabanwahanan nga naapektuhan sang pagbaha tuga sang pag-ulan nga dala ni bagyo Agaton.
Sa interview sang Bombo Radyo kay Rara Ganzon, focal person sang Provincial Social Welfare and Development Office (PSWDO), iya ginpahayag nga may gin-deploy na nga 1,699 ka family food packs kag kits sa banwa sang Sara kag 1500 man nga family food packs kag kits sa Ajuy.
Suno kay Ganzon, kahapon, may yara man sang 100 ka sako sang bugas nga gin-donate agud i-repack kag ipanagtag.
Subong nga adlaw, Abril 13, may yara man sang ginapaabot nga donasyon nga used clothings agud ihatag sa mga apektado nga pumuluyo.
Pahayag ni Ganzon, sa subong, yara sa 22 ka kabanwahanan ang apektado sang pagbaha.
Ini ginalakipan sang Leganes,New Lucena, Zarraga, Pototan, Dingle,Dueñas, Dumangas, San Enrique, Banate, Barotac Nuevo,Passi City, Ajuy, Balasan, Barotac Viejo, Batad, Carles, Concepcion, Estancia, Lemery, Sara, San Dionisio, kag San Rafael.
