Iloilo – Nagpasalig ang Iloilo Provincial Government nga tinguhaan nga malab-ot ang 100% rating sa Anti-Drug Abuse Council Perfromance Audit subong nga tuig 2023.
Ini matapos nga 95% rating lang ang nabaton sang probinsya sang 2022.
Sa interview sang Bombo Radyo kay Atty. Dennis Ventilacion, Provincial Administrator, iya ginpahayag nga pila sa basehan sang Department of the Interior and Local Government sa paghatag sang rating amo ang koordinasyon kag pagpakigsapol sang isa ka lugar sa mga concerned agencies kag implementasyon sang mga programa kag proyekto.
Suno kay Atty. Ventilacion, kun malab-ot ang 100% rating, mangin national awardee kuntani ang probinsya.
Apang apisar nga regional awardee ang Iloilo Province, nagpahayag ang Provincial Administrator nga mas pabaskugon pa sang probinsya ang pagpakig-away batuk sa iligal nga droga.
Dugang pa sang natungdan, may yara sang counterpart sa tanan nga level –sa barangay, banwa ukon probinsya ang Anti-Drug Abuse Council.
Handa man nga magbulig ang Iloilo Provincial Government sa idalom sang liderato ni Iloilo Gov. Arthur Defensor, Jr. ang pagpatuman sang mga proyekto nga makabulig papas kag makatapna sang iligal nga droga sa probinsya.
