Iloilo Provincial Government, wala na sang narekord nga kaso sang African swine fever sa pulo ka mga kabanwahanan sa probinsya

ILOILO – Wala na sang narekord ang Iloilo Provincial Government nga kaso sang African swine fever (ASF) sa pulo ka mga kabanwahanan sa probinsya.

Ini ang ginalakipan sang banwa sang Sta. Barbara, Alimodian, Leganes, Barotac Voejo, Mina, Badiangan, Barotac Nuevo, Dumangas, San Dionisio kag Zarraga.

Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga sa sulod sang duha ka bulan, wala sang reported cases sang African swine fever ang nasambit nga banwa pinaagi sa ginpasa nga African swine fever negative monitoring report.

Suno kay Tabuada, ginatinguhaan sang opisina nga mapapas ang balatian sa diin ginapamatay ang mga baboy nga makitaan sang sintomas sang African swine fever.

Ginpahayag dugang sang natungdan nga naga-base ini sa declaration sang isa local government unit kun mangin African swine fever-free ini ukon indi.

Nagaisahanon naman ang banwa sang Batad nga may yara pa sang kaso sang amo nga balatian.