ILOILO – Nagkalain-lain nga mga pamaagi ang pagahimuon sang Iloilo Provincial Government agud nga makabulig sa mga dengue patients.
Suno kay Mr. Jocel Mayor, Presidente sang Iloilo Provincial Government Employees Association, magapatigayon sang bloodletting activity ang provincial government sa Hulyo 16 sa Casa Real General Luna St, Iloilo City Proper.
Ang ini nga tikang ang pamaagi agud nga mabuligan ang mga dengue patients nga mahatagan sang nagakaigo nga dugo.
Sa bahin naman ni Lorain Talento, tiglawas sang Provincial Health Office, iya ginpahayag nga kinahanglan nga handa kag kwalipikado ang tawo nga mag-donar sang dugo.
Gina-engganyo man sang mga matungdan ang mga empleyado sang provincial government kag ila mga pamilya kag kakilala nga magbulig sa pagsugpon sang kabuhi sang mga pasyente nga naga-antos sa nasambit nga balatian.
Samtang luyag naman nga ipatawag ni Iloilo Governor Arthur Toto Defensor Jr ang mga pinuno sang tagsa ka mga engineering districts sa probinsya agud nga sapulon kag ma istoryahan ang katinlo sa mga dalanon sa tagsa ka mga kabanwahanan.
Nagpasalamat man ang gobernador sa mga alkalde sang tagsa ka mga kabanwahan, Board Members kag mga Barangay Officials nga nagbuylog sa “Do Day kontra Dengue” sang tinalikdan nga Sabado.
Gani nagasalig si Defensor nga mapabilin sa gihapon ang pagpaninlo sa mga lugar kada adlaw.
