Nagpasar sang resolusyon ang Iloilo Provincial Government nga nagakilala sa kadalag-an sang four-time Olympic weightlifter nga si Hidilyn Diaz nga amo ang labing-una nga nakakuha sang Olympic gold para sa Pilipinas.
Sa interview sang Bombo Radyo kay Iloilo Third District Board Member Jason Gonzales, iya ginpahayag nga paagi ini agud nga ipabutyag ang bugal sang Iloilo nga natapos na ang 97 ka tuig nga paghulat sang pungsod para sa bulawan sa Olympiada.
Suno kay Gonzales, maragtason man ini kag symbolic bangud magluwas nga may yara subong sang COVID-19 pandemic, ginpierde man sang Pilipinas ang China sa amo nga event.
Matandaan nga isa ka kilo lang ang abanse ni Diaz sa iya Chinese nga kontra nga si Liao Qiuyun sa 55 kilogram-event sang women’s weightlifting.
