Iloilo – Nagalaom ang Iloilo Provincial Health Office nga makabaton sang bivalent vaccines batok sa coronavirus disease 2019.
Sa interview sang Bombo Radyo kay Dr. Maria Socorro Colmenares-Quiñon, pinuno sang Iloilo Provincial Health Office, iya ginpahayag nga nagpabutyag sang excitement ang mga healthcare workers ilabi na ang mga nagatrabaho sa 13 ka mga district hospitals nga ginlakipan sang Iloilo Provincial Hospital sa Pototan, Iloilo, nga makabaton na sang bakuna.
Suno kay Quiñon, ginahibalo pa kun sanday sin-o ang magabaton sang bivalent vaccines.
Nahibaluan nga wala pa sang guidelines nga gin-issue ang Department of Health.
Samtang, nakabaton man sang report ang provincial government may kaangtanan sa mahina nga uptake sang COVID-19 vaccines.
As of March 9, may yara lang sang 1,377,816 nga mga indibidwal nga nabakunahan sa first dose; 1,292,372 sa second dose; 288,885 sa first booster; kag 24,861 sa second booster.
Nakatutok ang Iloilo Provincial Health Office sa pagbakuna sang 70 percent ukon 1,461,756 sang populasyon sa probinsya sang Iloilo.
