ILOILO CITY- Nagapanawagan ang Iloilo Provincial Health Office (IPHO) sa tanan nga 1,721 barangay sa probinsya sang Iloilo para i-activate ang Aksyon Barangay Kontra Dengue (ABKD) kag ang Barangay Health Emergency Response Team.
Ini kasunod sang pagsaka sang dengue cases sa bilog nga probinsya.
Sa interview sang Bombo Radyo kay Dr. Maria Socorro Colmenares Quiñon, head sang Iloilo Provincial Health Office, iya ginpahayag nga sa bilog nga rehiyon, ang probinsiya sang Iloilo ang nagapanguna sa may pinakamataas nga kaso kon sa diin, sa sulod sang isa ka semana humalin sang Hunyo 22 asta Hunyo 29, naglab-ot sa 175 ang mga bag-o nga nalista nga kaso.
Sa kabilugan suno kay Quiñon, nakalab-ot na sa 1,462 ang kaso sang dengue kon sa diin 5 sini ang nagkalamatay gid kag kalabanan sa mga nagkalamatay amo ang mga teenagers kag mga kabataan.
