ILOILO – Kakulang sang manpower ang isa ka mayor nga rason nga indi dali-dali makabalik sa full operation ang Iloilo Provincial Hospital sa Pototan, Iloilo.
Ini ang kasunod sang pagpositibo sa COVID-19 sang 16 ka mga health workers.
Ini ang ginabug-usan sang duha ka doktor, siyam ka mga nurses kag lima ka nursing attendants.
Sa interview sang Bombo Radyo kay Dr. Cynthia Cabangal Ng, head sang Hospital Management sa Probinsya sang Iloilo, iya ginpahayag nga limitado sa gihapon sa pagbaton sang mga pasyente ang nasambit nga ospital.
Ginalauman suno kay Ng nga magbalik sa full operation ang ospital sa Pebrero 19 apang nakadepende ini sa gihapon sa resulta sang contact tracing.
Kun magpadayon suno sa iya ang pagpositibo sang pila ka mga empleyado matapos ang swab test, mahimo nga mapalawig pa ang lockdown sa pila ka bahin sang ospital.
Gin-athag man sang natungdan nga nagapadayon sa gihapon ang services sa Outpatient Department sang ospital.
Samtang, sa bahin sang animal bite center, ginalimitahan lamang sa 50 ka mga pasyente ang gina-akomodar kag 25 ka pasyente naman sa prenatal care.
Sa subong, nagapadayon pa ang contact tracing, disinfection kag assessment sa availability sang manpower.
