ILOILO – Indi pagsiraduhan kag limitahan lang ang operasyon sang Iloilo Provincial Hospital sa Pototan, Iloilo matapos nagpositibo sa COVID-19 ang pila ka mga medical workers.
Sa interview sang Bombo Radyo kay Dr. Cynthia Cabangal Ng, head sang Hospital Management sa Probinsya sang Iloilo, iya ginpahayag nga sa pinakaulihi nga rekord, 16 ka mga health personnel ang nagpositibo sa COVID-19 sa nasambit nga ospital.
Ini ang ginabug-usan sang duha ka doktor, siyam ka mga nurses kag lima ka nursing attendants.
Suno kay Ng, lunsay may mild symptoms ang 16 nga nagpositibo sa virus kag naka-home quarantine na sa subong, magluwas lamang sa isa nga gin-admit sa ospital bangud may yara sang history sang sakit nga asthma.
Gin-athag naman sang natungdan nga indi anay pagpahanugutan sang talatapan ang admission kag surgical operations sang mga pasyente.
Apang magapadayon suno kay Ng ang services sa Outpatient Department.
Sa bahin sang animal bite, limitahan lamang sa 50 ka mga pasyente ang akomodaron kag 25 ka pasyente naman sa prenatal care.
Ginpahayag ni Ng, nga sa subong, nagapadayon ang contact tracing, disenfection kag assessment sa availability sang manpower.
Ginalauman nga magabalik sa full operation ang Iloilo Provincial Hospital sa Pototan, Iloilo sa Pebrero 19.
