ILOILO – Gin-athag sang Iloilo Provincial Government nga wala sang ipatuman nga Enhanced Community Quarantine sa probinsya sang Iloilo.
Sa interview sang Bombo Radyo kay Iloilo Governor Arthur Defensor Jr., iya ginpahayag nga lain na subong ang pag-impose sang community quarantine.
Suno kay Defensor, nagakadapat nga indi na longterm ang quarantine measures.
Ginpat-od sang gobernador nga indi na kinahanglan subong ang pag-istrikto sang quarantine classification bangud may yara na sang bag-o nga containment strategies ang probinsya sa pagtapna sang COVID-19 cases.
Dugang pa sang natungdan, kun may family clustering sang COVID-19 cases ukon paglatnanay sa sulod sang isa ka balay, mas maayo nga ipatuman na lamang ang ‘small lockdowns’.
Agud indi maapektuhan ang ekonomiya ukon banwa sang Iloilo Provonce, ginpahayag ni Defensor nga mas maayo nga kun kinahanglan, i-lockdown na lamang ang isa ka barangay, sitio, compound ukon isa ka balay sa diin nag-ugat ang paglatnanay sa COVID-19.
Matandaan nga ang syudad kag probinsya sang Iloilo ang yara sa idalom sang Modified General Community Quarantine (MGCQ) classification.
