ILOILO CITY – Ginmando ni Iloilo Provincial Police Office (IPPO) director Police S/Supt. Harold Tuzon sa tanan nga mga chief of police sa mga kabanwahanan ang pag-double time sa kampanya batok sa iligal nga droga.
Sa interview sang Bombo Radyo, ginpahayag ni Tuzon nga magatukod man sang drug enforcement team ang IPPO sa tagsa ka mga police station ukon station drug enforcement team nga amo ang maga-operate batok sa mga street level pushers.
Samtang provincial drug enforcement unit naman ang magapanglagas batok sa high value target sa duha ukon madamo pa nga munisipalidad sa probinsya sang Iloilo.
Hugot man nga ipatuman suno kay Tuzon ang bag-o nga pagsulundan sang Oplan Tokhang.
Naga-apelar naman ang pamunuan sang IPPO sa bulig sang Barangay Anti-drug Abuse Council kag Municipal Anti-Drug Abuse Council nga mag-validate sang mga impormasyun batok sa mga durugista.
Sa bulan sang Marso, 17 na ka mga drug personalities ang nadakpan sang IPPO.
Samtang, apisar nga nagalabo ang impormasyon sa drug lord nga si Richard Previndido, nagalaum si Tuzon nga madakpan ini.
Bangud sa kadako sang patong sa ulo ni Prevendido, base sa eksperyensya sang opisyal, bisan paryente sini ang magabaligya sa iya kag itudlo ini kun diin nagapanago.