ILOILO CITY– Gin-ako sang Provincial Tourism Office nga nakaagi sa ila opisina ang papeles sang 10 ka mga local strandees nga nagpauli gikan sa Caloocan sa Manila, apang sa ila papeles Batangas ang ila gingamit nga point of origin.
Sa interview sang Bombo Radyo kay Gilbert Marin, Iloilo Provincial Tourism Officer, iya ginahayag nga wala niya ginapanginwala nga nag-agi sa ila talatapan ang papeles sang 10 ka strandees.
Suno kay Marin, nagpatawag sa ila ang isa sa mga strandee nga magapauli kuntani sila, bangud napatay ang iya lolo, rason nga ginbuligan man nila ini.
Pahayag pa ni Marin, nakapauli ang napulo ka mga persona nga tumandok sang banwa sang Pototan bangud sa ila pagpangusisa, kumpleto man ang papeles sang mga ini.
Dugang pa ni Marin, nanghingyo pa kuntani ang amo nga strandee nga buligan agud makabalik sa Batangas, bangud mangin wala sang pulos ang iya pagpauli agud magtambong sa lubong sang iya lolo sa rason nga ipaidalom pa siya sa mandatory 14 day facility quarantine.
(photo from web)
