Liwat nga nagpahanumdum ang Iloilo Provincial Treasurer’s Office nga padayon sila sa gihapon nga nagabaton sang gusto maka-avail sang programa sa amnestiya sa real property tax (RPT) nga magatapos sa Hulyo 5, 2026.
Sa interview sang Bombo Radyo kay Fatima Bayona, Chief sang Tax Enforcement and Field Supervision Division sang Office of the Provincial Treasurer sang Probinsya sang Iloilo, iya ginpahayag nga para ini sa mga real property tax owners’ nga gusto magbayad sang wala pa nabayaran nga real property tax.
Suno pa sa iya nga pwede magpadulong ang property owner sa tagsa nila ka mga munisipalidad kun sa diin ang ila ginapanag-iyahan nga mga propidad ukon sa Bayad Center sa provincial capitol para makapag-avail sang amnestiya.
Dugang pa niya, ang katuyuan sang tax amnesty amo ang pag-engganyo sa mga property owner nga mangin matawhay ang ila obligasyon sa pagbayad sang buwis.
Nahibaluan nga ang amnestiya sulod pa sa idalom sang Republic Act 12001 ukon ang Real Property Valuation and Assessment Reform Act (RPVARA)nga may katuyuan nga mangin uniform kag base sa real market value.
Dugang pa ni Bayona, madamo sang ginatung-an ang real property tax nga nagakadto man sa mga maayo nga programa sang gobyerno para man sa benepisyo sang mga tawo.
