ILOILO – Ginasiguro sang Iloilo Provincial Veterinary Office nga bastante ang supply sang baboy sa probinsya sang Iloilo.
Sa interview sang Bombo Radyo kay Darrel Tabuada, officer-in-charge head sang Provincial Veterinary Office, iya ginpahayag nga wala sang double A slaughterhouse sa Iloilo sa diin ang mga frozen meat products nga ginadala diri sa Iloilo ang halin sa Cebu kag Mindanao.
Apang bangud nga gin-ban sa Iloilo ang pagsulod sang pork products sa Mindanao may kaangtanan sa African Swine Fever, ang Cebu na lamang ang nagasupply sang frozen meat.
Suno kay Tabuada, indi malab-ot sang Iloilo ang standard sang national meat inspection services agud nga mangin double A ang slaughterhouse sa probinsya.
Sa tion nga ideklara sang national meat inspection services nga double A ang slaughterhouse, mahimo na ini nga makabaligya sa iban nga lugar sa Pilipinas.
Pahayag niya, wala pa sang pagtaas sa presyo sang mga pork products sa diin ang farm gate price ang yara sa gihapon sa P105.
Nagamahal lamang ang presyo sang baboy kun may yara sang transport cost suno sa natungdan bangud ginadala ini sa isip sang mga manugbaligya agud nga makabawi sang ila nga gingasto.
Nagpangabay si Tabuada nga hugot nga ginadumilian ang pagpasulod sang baboy nga iligal sa Iloilo bangud mahimo nga apektado ini sang African Swine Fever.
