Iloilo – Imbestigaran sang Iloilo Provincial Veterinary Office ang pagkapatay sang isa ka indibidwal nga ginaalegar ginkagat sang layaw nga ido sa Guimbal, Iloilo.
Sa interview sang Bombo Radyo kay Dr. Darel Tabauda, Provincial Veterinarian, iya ginpahayag nga ginahulat na lang nga maguwa ang resulta sang saliva sample agud mahibaluan kun rabies ang kabangdanan sang kamatayon sang biktima.
Sa tion nga may yara na sang laboratory result, mahulat ang Provincial Veterinary Office sang endorsement halin sa Provincial Health Office sa pag-conduct sang deceased investigation.
Suno kay Dr. Tabuada, base sa inisyal nga impormasyon nga nabaton niya halin sa Municipal Agriculture’s Office, ginhatagan sang biktima sang pagkaon ang totoy apang ginkagat ini sang amo nga sapat.
Sa subong, indi na makita pa ang ido bangud ginapahayag nga Enero 25, 2023 pa ini natabo kag Pebrero sang gin-admit sa ospital ang biktima.
Paathag ni Dr. Tabuada, kun carrier sang rabies ang ido, posible nga patay naman ini bangud makatinir lang ini nga buhi sa sulod sang 3-5 days humalin sang ini ang may ginkagat nga tawo base sa case observation.
Sa tion man nga makumpirma sa saliva sample nga rabies ang gintunaan sang kamatayon sang biktima, una nga lihok nga himuon sang talatapan amo nga i-revaccinate ang tanan nga mga ido nga sakop sang 1km radius kun sa diin ang index case.
