Nagpatigayon sang contact tracing sa mga ido nga positibo sa rabies ang Iloilo Provincial Veterinary Office.
Sa interview sang Bombo Radyo kay Dr. Darel Tabuada, Veterinarian sa Iloilo Provincial Veterinary Office, iya ginpahayag nga sa subong, may kabug-usan nga 9 ka mga ido ang nagpositibo sa rabies sa probinsya sang Iloilo.
Suno kay Tabuada, lakip sa nabalhag amo ang banwa sang Igbaras nga may isa, samtang isa man sa Miagao, duha sa Tigbauan, isa sa Zarraga, Maasin, Pototan, Batad, kag Dumangas.
Ginpahayag man sini nga ang tanan nga nasambit nga banwa ang ila na nga napadulongan agud ma-address ang amo nga concern.
Gintuad man sang natungdan nga ang mga ido nga nagpositibo ang ma-trace kag matumod man ang mga ido nga na-contact sini.
Ini agud man nga indi na magdugang-lapta ang rabies ilabi sa mga ido nga nagalagaw.
