ILOILO CITY- Nagbukas na liwat ang Iloilo Provincial Capitol matapos ang duha ka adlaw nga lockdown matapos nagpositibo sa COVID-19 ang isa ka jobhire sa General Services Office.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga yara lang sa kapin 60% ang workforce sa kapitolyo bangud work from home ang mga empleyado nga naga- edad sang 60 anyos pataas.
Suno kay Mamon, lakip man sa mga dumilian nga magtrabaho amo ang mga nalakip sa Low, medium kag High Risk nga close-contact sang COVID-19 patient.
Nahibaluan nga 9 ang nalakip sa high risk, 8 sa medium risk kag 32 ang low risk nga close contact sang pasyente.
Ang mga nalakip sa high risk ang naka-facility quarantine samtang ang mga yara sa medium kag low risk ang naka-home quarantine.
