ILOILO – Dapat nga mapangitaan sang paagi sang Iloilo Provincial Government kun paano mapasangkad ang reading comprehension sang ginabanta 42,000 ka estudyante nga yara sa frustration level.
Ini ang pahayag ni Iloilo Gov. Arthur Defensor Jr. kasunod sang pahayag sang Department of Education nga madamo sang elementary students sa probinsya sang Iloilo ang makahibalo magbasa apang indi makahangop sa ila ginabasa.
Sa interview sang Bombo Radyo kay Defensor, iya ginpahayag nga iya na nga ginpangayo ang data sang frustration level sa tagsa ka banwa sa probinsya agud nga mahibaluan kun sa diin nga lugar ang may yara sang pinakamadamo nga estudyante nga mahina sa reading comprehension kag kun ano ang lihok sang tagsa ka Local Chief Executive.
Suno kay Defensor, dapat nga hibaluon ang problema kun nga-a mahina sa reading comprehension ang mga estudyante.
Ginaduso man ni Defensor ang pagpakig-angot sa mga ahensya sang gobyerno lakip na sa mga non-government organization sa pagpatigayon sang lihok agud nga mapanubo ang frustration level sa elementary students.
