ILOILO CITY – Indi na kinahanglan pa nga maghimo sang contingency plan ang Iloilo Provincial Government bilang pagpanghanda sa ginapa-abot nga El Niño phenomenon.
Sa interview sang Bombo Radyo kay Dr. Ildefonso Toledo, head sang Iloilo Provincial Agricuture Office, iya ginpahayag nga madugay na nga may yara sang nakaplastar nga mga programa ang opisina nga naga-address sa El Niño ukon La Niña.
Base sa Philippine Atmospheric Geophysical and Astronomical Services Administration, may yara sang dako nga posibilidad nga ma-eksperyensyahan ang El Niño ukon mainit nga panahon sa Hulyo tubtob Septyembre kag magapadayon tubtob sa 2024.
Bangud sini, ginalauman nga ang mangin apektado amo ang agriculture kag fishing industry.
Suno kay Toledo, nasaad na sa regular programming sang probinsya ang mga mitigation activity agud mahagan-hagan ang epekto sang El Niño sa mga mangunguma.
Sa pagkamatuod pahayag niya, may yara sang climate resilience program ang Provincial Agriculture Office sa diin naga-eksister ang small scale-irrigation project kag water system projects sa barangay level.
Magluwas sini, may programa man nga ginapatuman ang provincial government kaangay sang small water impounding kag small farm reservoir sa idalom sang small-scale irrigation project.
Dugang pa sang natungdan, ginapatuman man sang probinsya ang Climate Field School nga nag-umpisa sa Dumangas, Iloilo sang tuig 2022 sa diin, ang mga mangunguma ang ginatudluan nga maggamit sang weater forecast sang Philippine Atmospheric Geophysical and Astronomical Services Administration nga nasantu sa ila nga farming schedule.
Nahibaluan nga sang tuig 2019, ginpaidalom sa state of calamity ang probinsya bangud tanan nga 42 ka mga banwa kag isa ka component city ang naapektuhan sang El Niño sa diin naglab-ot sa masobra P1.2 billion ang rice crop losses.
