ILOILO CITY – Luyag sang probinsya sang Iloilo nga ma-involve ang kabataan sa mainstream programs partikular na sa agrikultura kag pagnegosyo.
Ini ang mensahe ni Iloilo Governor Arthur Defensor, Jr. sa opening program sang Linggo ng Kabataan 2023 nga ginpatigayon sa Capitol lobby.
Ang 4th Entrepreneur ang programa sang gobernador nga may tinutuyo nga matipon ang tanan nga mga bata-on nga Ilonggo businessmen kag ma-develop sa ila ang entrepreneurial mindset.
Gina-enganyo man niya ang mga ini sa pag-engage sa agrikultura kag mangin young farmers.
Sa interview naman sang Bombo Radyo kay Sangguniang Kabataan Provincial Federation president kag ex-officio Board Member Bianca Requinto-Espinosa, iya ginpahayag nga ang pagpanguma kag ang pagnegosyo ang mga butang nga masami nga ginalikawan sang mga kabataan bangud para sa ila, para lang ini sa mga hamtong.
Apang suno kay Espinosa, ini ang para sa mga kabataan subong nga henerasyon kag sa pala-abuton.
Ang Linggo ng Kabataan ang tuigan nga programa sang probinsya agud nga magkilala sang tuman ka importante nga papel sang mga pamatan-on subong ilabi na sa mga social issues.
