ILOILO – May yara sang igatanyag nga libre-sakay ang Iloilo Provincial Government kadungan sang patigayunon nga transport strike sa Lunes, Setyembre 30.
Ini ang kasunod sang ginpatigayon nga emergency meeting ni Iloilo Governor Arthur Defensor Jr. kaupod ang mga tiglawas sang nanari-sari nga ahensya sang gobyerno.
Sa interview sang Bombo Radyo kay Defensor, iya ginpahayag nga 24 ka light vehicles kag 7 ka dump trucks ang iga-deploy sa probinsya ang Iloilo agud nga may yara sang sakyan ang mga pasahero nga may yara sang transaksyon sa syudad sang Iloilo.
Suno kay Defensor, wala na siya nagdeklarar sang class suspension bangud nga kalabanan man sa mga estudyante sa probinsya sang Iloilo ang naga-eskwela naman sa syudad sang Iloilo sa diin may yara na sang mandu si Iloilo City Mayor Jerry Treñas nga kanselado ang klase sa tanan nga level.
Ginpahayag ni Defensor nga ang mga salakyan ang maga stand-by sa Iloilo Provincial Capitol kag magasugat sang pasahero nga magadagsa sa tagsa ka terminal.
