ILOILO CITY – Agud nga masolbar ang pagbaha nga madugay na nga problema sa central kag northern parts sang Iloilo, magapangayo sang bulig ang provincial government sa national government para sa dugang nga mga floodways.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga sa nagligad nga tatlo ka tuig, natumod na sang provincial government ang mga lugar nga masami ginabaha.
Apang sa subong, may yara sila sang nakita nga mga bag-o nga lugar nga ginbaha sa pinakauna nga tion.
Suno sa iya, may pila ka mga river systems nga naga-agi sa mga distrito apang ang iban ang wala sang ikasarang nga magkontrol sang pagpagwa sang tubig sa mga kadagatan.
Ginhalimbawa pa sang gobernador ang Jaro floodway sa Barangay Buhang, Jaro, Iloilo City nga gintukod sang administrasyon ni anay presidente Gloria Macapagal-Arroyo.
Apang gin-ako man sang gobernador nga ang ini nga kaangay nga proyekto ang indi masarangan sang provincial government lamang.
Bangud sini, magapangayo siya sang bulig nga malakip ini sa isa sa mga priority projects sang subong nga administrasyon.
Sa subong, pahayag niya, magapadayon ang pagpatuman sang probinsya sang “Limpyo Dalanon” program nga may tinutuyo nga mahawanan ang dalanon kag waterways.
Mas maayo man suno sa gobernador nga matukod na ang Department of Water Resources bangud nga nagalapta sa nagkalain-lain nga ahensya ang pagpatuman sang gobyerno sa water resources management.
