ILOILO CITY – Magatutok ang Iloilo Provincial Government sa pagpatindog sang madamo nga classrooms agud mapa-ayo pa ang kalidad sang edukasyon sa probinsya.
Sa interview sang Bombo Radyo kay Governor Arthur Defensor, Jr., iya ginpahayag nga pinaagi sa Special Education Fund, agresibo ang iya administrasyon sa pagpatuman sang mga infrastructure programs nga suportado sang Department of Education.
Suno sa gobernador, ang classrooms ang isa sa mga paborito niya nga proyekto.
Ang Bulig Eskwela sang Probinsya ukon Bes Probins program nga ideya sang gobernador ang nagahatag sang pondo para sa pagpatukod, pag-repair ukon maintenance sang school buildings kag iban pa nga pasilidad sa mga pampubliko nga eskwelahan.
Ang probinsya ang nagatukod sang building nga mapag-on agud nga mabatu-an ang mga bagyo kag iban pa nga kalamidad kag magaserbe man nga evacuation centers.
Ini nga programa ang nagalakip man sang pagtukod sang health areas ukon pasilidad kaangay sang school clinics kag wash areas.
Ang probinsya ang nagatukod man sang teen center buildings bilang pagsuporta sa adolescent health kag psychosocial needs sang mga pamatan-on.
Magluwas sa infrastructure projects, ang probinsya ang naga-hire man sang 300 nga dugang nga manunudlo pinaagi sa Provincial School Board agud nga mag-augment sa kakulang sang teaching staff.
Subong nga tuig, nagpa-in ang provincial government sang masobra P200 million para sa Special Education Fund.
