ILOILO CITY – May paathag ang Iloilo Provincial Government kun nga-a temporaryo nga ginpatinir sa Iloilo Sports Complex ang repatriated Overseas Filipino Workers nga nagsakay sa sweeper flights halin sa Metro Manila.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga ang una nga batch sang OFWs nga nagpauli sa Iloilo ang may yara sang kumpleto nga detalye sa manifesto rason nga nangin madali ang pagsugat sa ila.
Suno kay Atty. Mamon, ang masunod nga batch sang mga nagpauli nga OFW ang temporaryo nga ginpatinir sa Iloilo Sports Complex bangud nga indi kumpleto ang detalye nga nakasulat sa manifesto nga amo naman ang nagpaatrasar sang koordinasyon sa tunga sang Local Government Unit.
Ginpahayag ni Atty. Mamon nga sang nakumpleto na ang detalye kag napahibalo na ang tagsa ka Local Government Unit, amo na ugaling kag natigayon ang pagsugat sa mga OFW padulong sa tagsa ka quarantine Facility.
May iban naman nga Local Government Unit nga nagpahayag nga sa ila quarantine facility na lang patigayunon ang swab test apang may iban naman nga OFW nga ginkuhaan sang swab samples sa Iloilo Sports Complex.
