ILOILO CITY – Naga-upod ang Iloilo Provincial Government sa pagselebrar sang World Breastfeeding Week kag National Breastfeeding Awareness Month 2023.
Sa bilog nga kalibutan, ang World Breastfeeding Week ang ginapatigayon sa tagsa ka una nga semana sang Agosto nga suportado sang World Health Organization, United Nations Children’s Fund, kag madamo nga Ministries of Health kag civil society partners.
Ang tema subong nga tuig ang nagatutok sa pag-breastfeed sa trabaho kag paghatag sang strategic opportunity nga mag-advocate para sa importante nga maternity rights para sa mga nagatrabaho nga ginikanan.
Ini amo ang “Enabling Breastfeeding: Making a difference for working parents” nga may call for action nga “Let’s make breastfeeding and work, work!”
Sa interview sang Bombo Radyo kay Dr. Wendel T. Marcelo, Provincial Health Officer 1, iya ginpahayag nga madamo sang ginhanda nga aktibidad ang probinsya bilang pagsuporta sa isa ka bulan nga kampanya.
Suno kay Marcelo, ginbuksan ang Breastfeeding Month Exhibit sa Capitol Lobby nga ginpangunahan nanday Governor Arthur Defensor, Jr. kag Provincial Health Officer Dr. Maria Socorro C. Quiñon upod sa mga department heads kag capitol employees.
May yara man sang Wall of Commitment nga naga-imbitar sa tanan nga magdihon sang pledge sa kun paano makasuporta sa Iloilo Provincial Capitol nga mangin Mother-Baby Friendly Workplace.
Imbitado man ang mga breastfeeding mothers nga magpakigbahin sang ila nga breastfeeding experiences sa Wall of Breastfeeding Memories.
Ang Wall of Breastfeeding Moms of Iloilo Capitol naman ang naga-imbitar sa mga empleyado sang kapitolyo nga magkabit sang ila breastfeeding moments kag may tsansa nga magbaton sang breastfeeding kit.
Updan man sang probinsya ang Breastfeeding Month activities sang mga local government units.
May yara man sang patigayunon nga symposium kag lectures para sa mga nagabusong kag breastfeeding moms.
