ILOILO CITY – Nagahulat na lamang ang Iloilo provincial government sang approval sang Department of Transportation para sa transport route plan.
Sang Mayo 26 subong nga tuig, ginpasa sang probinsya ang Iloilo Provincial Public Transport Route Plan 2023-2026 sa Land Transportation Franchising and Regulatory Board VI nga natalana nga i-transmit sa Department of Transportation para sa review kag komento.
Sa interview sang Bombo Raydo kay Mr. Mario Nillos, pinuno sang Iloilo Provincial Planning and Development Office, iya ginpahayag nga magapatigayon sang serye sang konsultasyon kag simulation ang probinsya upod sa Department of Transportation para sa posible pagbag-o kag improvements.
Sa tion nga mabaton na ang plan, maga-isyu ang Department of Transportation sang Notice of Compliance kag ipasa sa gobernador.
Pagkatapos sina suno kay Nillos, i-enact sang Sangguniang Panlalawigan bilang zoning ordinance.
Sunod nga maga-issue sang memorandum circular nga nagapatuman sang transport route plan.
Suno pa kay Nillos, ang probinsya ang nakasugod na sang training sa technical people bilang pagpanghanda sa dry run nga magalawig sang isa ka bula.
Ang three-year plan ang nagasanto man sa plano sang syudad kag ginabug-usan sang 67 rationalized routes kag walo ka bag-o nga mga ruta.
Ang numero sang unit nga pahanugutan sa mga ruta ang magadepende sa resulta sang dry run.
