ILOILO CITY – Nagaplano ang provincial government nga magpatuman sang “sentinel” program agud nga makasugod na sa pag-repopulate sang baboy.
Suno pa sa gobernador, ang programa ang magasugod sa tion nga may yara na sang “sentinel” piglet nga ihatag ang Department of Agriculture sa mga target barangays.
Sa interview sang Bombo Radyo kay Iloilo Governor Arthur Defensor Jr., iya ginpahayag nga antes ang repopulation, magasagud anay sang baboy sa mga barangay agud nga ma-monitor kun may yara pa sang presensya sang African swine fever.
As of May 29, siyam sa 25 ka mga munisipyo nga apektado sang balatian ang wala na sang kaso sa sulod sang duha na ka bulan.
Magluwas sa banwa sang Batad kag Maasin nga naka-record sang duha ka kaso subong nga bulan, ang nabilin nga mga apektado nga banwa ang wala na sang kaso sa sulod sang masobra isa ka bulan.
Ang paglapta sang animal disease ang naghina bangud sa pagnubo sang swine population nga nagresulta man sa pagnubo sang posible malatnan sini.
Ang pagtuman sang hog raisers sa biosecurity measures ang nakabulig man sang dako.
