ILOILO – Naglab-ot sa P43.5 Million ang kabug-usan nga cash assistance nga ginhatag sang Iloilo Provincial Government sa kabanwahanan sa probinsya sang Iloilo.
Sa interview sang Bombo Radyo kay Gov. Arthur Defensor Jr., iya ginpahayag nga ang tagsa ka Local Government Unit ang nagbaton sang P1 Million apang bangud nga may yara sang nagpositibo sa Coronavirus Disease 2019 (COVID-19) sa Guimbal, naglab-ot sa P1.5 Million ang cash assistance nga ginhatag para sa nasambit nga banwa.
Suno kay Defensor, halos tanan ang naga-antos sa ginapatuman nga Enhanced Community Quarantine bangud nga isa lang kada pamilya ang ginahatgan sang quarantine pass kag ang prayoridad amo ang mga naganegosyo kag nagatrabaho.
Ginpahayag ni Defensor nga apisar sang Enhanced Community Quarantine, indi mahimo nga siraduhan ang border ukon ang boundary bangud nga maapektuhan ang negosyo kag ang ekonomiya sang lugar.
May kaangtanan naman sa test kits, ginpahayag sang gobernador nga may yara sang reserba nga 5,000 ang Iloilo Provincial Government kun sa diin ang isa ka test kit ang mahimo nga magamit sang 22 ka pasyente.
Tuhoy naman sa ginapatuman nga Enhance Community Quarantine, ginpahayag sang natungdan nga kun hangpon kag sundon lang ang kaundan sang Executive Order 080 kag ang kaundan sang ginahatag nga quarantine pass, wala sang pagsalangisag nga matabo.
