ILOILO – Padayon ang monitoring sang Iloilo Provincial Government may kaangtanan sa pagpatuman sang General Community Quarantine sa probinsya sang Iloilo umpisa subong nga adlaw, Mayo 16.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga sa una nga adlaw sang General Community Quarantine, wala pa sang dalagko nga insidente nga natabo sa bug-os nga probinsya.
Suno kay Defensor, may yara sang border restrictions ilabi na sa mga residente sang iban nga probinsya kag syudad sa Western Visayas apang exempted naman ang mga government employee, medical workers, humanitarian workers kag frontliners nga may trabaho may kaangtanan sa Coronavirus Disease 2019 (COVID-19).
Katuyu-an sang nasambit nga lihok suno kay Defensor amo nga malimitahan ang pagguwa-sulod sa probinsya kag para naman sa local strandees, magpakig-angot gid sa Local Government Unit agud nga mapadasig ang paghatag sang requirements sa pagpauli.
Hugot man nga ginapatuman ang Liquor ban bangud nga ang ilimnon ang isa sa mga rason sang pagpatigayon sang pagtililipon kag indi na masunod ang social distancing.
Kinahanglan nga sundon ang tanan nga protocol suno sa Gobernador agud nga wala na sang second wave sang virus kag matapos gilayon ang pandemya.
