ILOILO – Ginaimbestigaran na sang Iloilo Provincial Health Office ang pasyente nga na-record bilang labing una nga kaso sang omicron subvariant XBB.1.16 ukon ‘Arcturus’.
16 anyos ang pasyente, babayi, asymptomatic, kag naka-recover na sandig sa official report sang Department of Health.
Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office, iya ginpahayag nga nangin lapnagon sa liwat ang balatian kun sa diin kinahanglan ang pag-obserar sang preventive measure agud malikawan ang balatian.
Suno kay Labis, nakatutok ini sa pagpabakuna sang mga pumuluyo humalin sa 50% vaccine coverage tubtob sa 100%.
Sa subong, nagpanugyan ang natungdan nga kinahanglan nga hatagan sang igtalupangod ang ikaayong lawas kun sa diin nagakadapat nga magsunod ang abiso sang mga eksperto agud maprotektahan ang kaugalingon sa virus.
