Iloilo Rep. Garin, nagpaathag sa pagboto pabor sa Death Penalty Bill

ILOILO CITY – Nagpaathag si Iloilo First Distrit Rep. Richard Garin sa pagpabor sini sa liwat nga pagbuhi sang silot nga kamatayon sa pungsod.
Suno kay Rep. Garin sa exclusive interview sang Bombo Radyo, ang ginpasar nga hagna ang nagasakop sang mga drug-related cases, sa diin madala naman ang mga heinous crimes kaangay sang murder kag rape bangud naimpluwensyahan man sang ginadumilian nga droga ang mga tawo nga nagabuhat sini.
Pahayag pa sang kongresista, nagpatigayon siya sang konsultasyon sa mga pumuluyo sang first district kag kalabanan sa mga ini ang nagpabor sa death penalty kun puro lang drug-related cases.
Dugang pa sini, ang hukom ang maga-determinar kun gilayon nga ipatuman ang silot nga kamatayon ukon life imprisonment sa mga napamatud-an nga nakasala.
Ginpanginwala sang kongresista ang mga impormasyon nga ginpahog sila agud paboran ang hagna.
Ini matapos nga naggwa ang impormasyon nga ginapamahog ang mga kongresista nga kuhaan sang posisyon pananglitan nga indi magboto pabor sa pagpasar sang death penalty.