ILOILO CITY – Nangin sentro sang performance sang Ilongga Kundiman singer nga nagkampyeon sa 2019 Diwang: Sagisag Kultura National Finals Competition and Festival sa Bulacan ang makahalanusbo nga Iloilo Strait tragedy sang nagligad nga tuig.
Sa Good Morning Philippines program, ginpahayag ni Eloize Suzzane Pueblo, Grade 9 Student sang Iloilo National High School – School for the Arts, nga ang iya gin-amba ang may tig-ulo nga DALAMPASIGAN ang nahanungod sa isa ka iloy nga nagahulat sa pag-abot sa iya anak.
Suno kay Pueblo, Pop ang genre ang iya kun tani hilig apang bangud sa pila ka sirkumstansya, ginpili siya nga mag-amba sang Kundiman nga isa ka genre sang traditional Filipino love songs.
Kasubong sa iban nga singers, ginasunod man sang natungdan kun ano ang mga dapat kag indi dapat agud nga indi maapektuhan ang iya tingog kun sa diin sulundon na sa ila pamilya ang hilig sa pag-amba.
Ginpahayag ni Pueblo nga sa ginpatigayon nga national competition sa Bulacan nga gin-sponsor sang National Commission for Culture and the Arts, siya ang pinakabata sa 14 ka performers.
Bisan siya suno kay Pueblo ang nakibot sa paglawag sang iya pangalan nga nagkampeyon sa patag sang Kundiman nga sadto anay wala niya nakahiligan.
Samtang, yari naman ang kabahin sang pag-amba ni Pubelo sang DALAMPASIGAN nga iya nangin liyabe sa pagkuha sang kampyeonato.
